
كتير من اللي بيفكروا يدخلوا الاستثمار الزراعي بيبدأوا بحثهم بنفس الجملة: «عايز استثمار زراعي آمن». والطلب منطقي، محدش عايز يحط فلوسه في حاجة يفضل قلقان عليها. بس بصراحة، مفيش استثمار آمن 100%، لا في الزراعة ولا في غيرها. اللي تقدر تعرفه هو المخاطر موجودة فين، ومين بيديرها، وبيديرها إزاي.
المخاطرة موجودة في كل حاجة
حتى الحاجات اللي الناس بتعتبرها آمنة فيها مخاطرة من نوع تاني. الفلوس اللي في البنك قيمتها الشرائية بتقل مع غلاء المعيشة، والدهب سعره بيطلع وينزل مع السوق العالمي، والاتنين في الآخر ادخار بيحافظ على قيمة فلوسك أكتر ما بيكبّرها. حتى العقار ممكن يقف سنين من غير ما يتباع أو يتأجر. فالمهم إنك تكون فاهم المخاطرة من الأول، وعارف مين واخد باله منها.
مخاطر الاستثمار الزراعي وإزاي بتتدار
المياه
أي مزرعة من غير مصدر مياه ثابت ونضيف مالهاش مستقبل، مهما كانت الأرض كويسة. وعشان كده المياه أول حاجة بتتجهز، قبل ما فسيلة واحدة تنزل الأرض.
في مزرعة نخيل باسقات، الشغل بدأ بحفر الآبار. عندنا 3 آبار مياه جوفية، كل بئر فيهم بيغطي 160 فدان، ومحسوب على احتياج النخلة الكبيرة من المياه، وهو في تصميم الري عندنا 150 لتر يوميًا. وحللنا المياه، وطلعت نسبة الملوحة فيها 213 جزء في المليون، وده بيخليها مناسبة جدًا للنخيل.
ومش كده وبس، عملنا كمان حوضين ترسيب سعتهم الإجمالية 30 ألف متر مكعب. الحوضين دول بينضفوا المياه من الرواسب قبل ما تدخل شبكة الري، وهما الأمان المائي للمشروع. ولو حابب تعرف أكتر عن تجهيز الأرض قبل الزراعة، اقرا ليه النخيل من أفضل الاستثمارات الزراعية.
الآفات والأمراض
النخلة زي أي زرعة، ممكن تتصاب لو مفيش حد بيتابعها. وأحسن طريقة للتعامل مع الإصابة إنها ما تحصلش من الأساس، وده بيبدأ من الفسيلة نفسها. بنختارها سليمة، من غير إصابة فطرية ولا سوسة، وبتتطهر قبل الزراعة. وبعدها فيه فريق مقيم بيتابع النخل يوميًا، تحت إدارة أ. مصطفى فرحات أبوزهرة المدير التنفيذي، وبإشراف مستشارين متخصصين في زراعة النخيل، منهم د. أحمد رجب استشاري النخيل، بيتدخلوا وقت الحاجة.
الموسم والأسعار
دي مخاطرة محدش يقدر يلغيها. الإنتاج بيختلف من موسم للتاني، وسعر البيع وقت الحصاد مرتبط بالسوق. اللي ممكن يتعمل هنا إن كل حاجة تبقى واضحة قدامك. محدش يقولك رقم ثابت للعائد قبل ما تبدأ، والسيناريوهات وافتراضاتها تتشرحلك لو طلبتها، وبعد كل حصاد تعرف اللي حصل في موسمك زي ما هو.
الإدارة
ممكن تبقى الأرض كويسة والمياه متوفرة، والمشروع يخسر برضه بسبب الإدارة. ودي المخاطرة اللي تقدر تقيّمها بنفسك قبل ما تدفع. العقد متاح تراجعه كامل؟ تقدر تزور المزرعة وتشوف بعينك؟ إجابات الأسئلة دي بتوضحلك طريقة الإدارة أكتر من أي كلام تسويقي. ولو لسه محتار بين إنك تشتري أرض وتديرها بنفسك أو تستثمر في مشروع مُدار، اقرا الفرق بين الاختيارين.
الوقت
الاستثمار في النخيل محتاج صبر. أول تلات سنين بتبقى تأسيس ونمو من غير إنتاج. والتبشير، يعني أول طرح للنخلة، بيبدأ في السنة الرابعة، ومع نهايتها بييجي أول عائد. أما الإنتاج التجاري فغالبًا بيبدأ من السنة السادسة للسابعة، لأن الإنتاج بيزيد تدريجيًا مع عمر النخلة. واللي بيوصلك في الآخر هو صافي العائد، بعد خصم مصاريف الرعاية من الإنتاج.
اللي محتاج فلوسه خلال سنة أو سنتين، الاستثمار ده مش هيناسبه. أما اللي يقدر يستنى من غير ما يضطر يسحب فلوسه، فالمخاطرة دي عنده أقل بكتير.
قبل ما تختار
لو حد قالك إن مشروعه مفيهوش أي مخاطرة، أو وعدك بعائد ثابت من أول سنة، اسأله أكتر لحد ما تطمن، واطلب منه يشرحلك هيتعامل مع كل مخاطرة من دول إزاي قبل ما تاخد قرارك.
نخيل باسقات
نخيل باسقات مشروع استثمار زراعي شامل، متخصص في نخيل المجدول، في واحة الفرافرة بمحافظة الوادي الجديد. إحنا علينا الزراعة والرعاية والحصاد وتسويق الإنتاج، وإنت عليك تتابع وتتأكد. بتوصلك تحديثات مصورة على قناة تليجرام خاصة بالمشاركين، وتقدر تزور المزرعة في أي وقت في السنة بالتنسيق مع الفريق. اطلب السيناريوهات وافتراضاتها، واعرف كل حاجة عن المشروع قبل ما تقرر.



